Evdə (səyyar) sosial xidmətin göstərilməsi Qaydasının təsdiq edilməsi barədə

 

AZƏRBAYCAN RESPUBLİKASI NAZİRLƏR KABİNETİNİN QƏRARI

 

Sosial xidmət haqqında Azərbaycan Respublikası Qanununun tətbiqi barədə Azərbaycan Respublikası Prezidentinin 2012-ci il 14 mart tarixli 600 nömrəli Fərmanının 1.1.8-ci yarımbəndinin icrasını təmin etmək məqsədi ilə Azərbaycan Respublikasının Nazirlər Kabineti qərara alır:

Evdə (səyyar) sosial xidmətin göstərilməsi Qaydası təsdiq edilsin (əlavə olunur).

 

Yaqub EYYUBOV,

Azərbaycan Respublikası Baş nazirinin birinci müavini

 

Bakı şəhəri, 31 yanvar 2013-cü il

17

 

 

 

Azərbaycan Respublikası Nazirlər Kabinetinin

2013-cü il 31 yanvar tarixli 17 nömrəli qərarı ilə

TƏSDİQ EDİLMİŞDİR

 

 

Evdə (səyyar) sosial xidmətin göstərilməsi

 

Q A Y D A S I

 

1. Ümumi müddəalar

 

1.1. Bu Qayda Sosial xidmət haqqında Azərbaycan Respublikası Qanununun 19.1-ci maddəsinə əsasən hazırlanmışdır və əmək qabiliyyətli qohumları və ya qanuni nümayəndələri ilə eyni yaşayış məntəqəsində yaşamayan və sosial xidmətə ehtiyacı olan tənha ahıllara, ahıl ər-arvadlara, əlilliyi olan şəxslərə, xəstəliyin terminal (son) mərhələsində olan şəxslərə evdə (səyyar) sosial xidmətin göstərilməsi məsələlərini tənzimləyir. [1]

1.2. Eyni yaşayış sahəsində yaşayan ər-arvada, valideyn-övlada və bacı-qardaşa bir sosial xidmətçi tərəfindən sosial məişət xidməti göstərilir.

1.3. Evdə reabilitasiya xidmətləri göstərilməsi üçün əlilliyi olan şəxslər ayrıca qeydə alınırlar.

1.4. İctimai təhlükəli xəstəliyə tutulmasına görə həyat fəaliyyəti məhdudlaşan şəxslərə evdə (səyyar) sosial xidmət göstərilmir.

 

2. Evdə (səyyar) sosial xidmət göstərilməsi üçün müraciət edilməsi

 

2.1. Əmək qabiliyyətli qohumları və ya qanuni nümayəndələri ilə eyni yaşayış məntəqəsində yaşamayan və sosial xidmətə ehtiyacı olan tənha ahıllar, ahıl ər-arvadlar, əlilliyi olan şəxslər, xəstəliyin terminal (son) mərhələsində olan şəxslər evdə (səyyar) sosial xidmət göstərilməsi üçün yaşayış yeri üzrə Azərbaycan Respublikasının Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondunun şəhər, rayon şöbələrinə (bundan sonra - Şöbə) və ya DOST mərkəzlərinə (bundan sonra - Mərkəz) ərizə ilə müraciət edirlər.[2]

2.2. Sosial xidmət göstərilməsi üçün ailənin yetkinlik yaşına çatmış üzvlərindən biri və ya şəxsin (ailənin) maraqları çərçivəsində şəxsin valideynləri, digər qanuni nümayəndəsi (qəyyumu, himayəçisi), bələdiyyələr, qeyri-hökumət təşkilatları, habelə həmin şəxsin razılığı ilə digər şəxslər sosial xidmət göstərilməsi üçün Şöbəyə və ya Mərkəzə müraciət edə bilər.[3]

2.3. Sosial xidmətin göstərilməsi barədə müraciət Şöbəyə və ya Mərkəzə daxil olduğu gündən sonra, 10 (on) iş günü müddətində sosial işçi tərəfindən sosial xidmətə olan tələbatın qiymətləndirilməsi və müəyyənləşdirilməsi aparılır və sosial xidmətin formasını, növünü, sosial xidmətin göstərilməsi yerini və müddətini özündə əks etdirən hesabat və şəxsə (ailəyə) sosial xidmət göstərilməsinə dair fərdi plan hazırlanır.

2.4. Sosial işçi tərəfindən hesabatın təqdim edildiyi gündən sonra, 5 (beş) iş günü müddətində Şöbə və ya Mərkəz tərəfindən sosial xidmətin göstərilməsi və ya sosial xidmətin göstərilməsindən imtina edilməsi barədə qərar qəbul olunur.

 

3. Evdə (səyyar) sosial xidmətin təşkili

 

3.1. Evdə (səyyar) sosial xidmət həmin xidmətin xarakterindən asılı olaraq, sosial işçi və sosial xidmətçi tərəfindən göstərilir.

3.2. Sosial işçi tərəfindən göstərilən xidmətlərə aşağıdakılar daxildir:

3.2.1. sosial xidmətə ehtiyacı olan şəxsə tibbi və psixoloji yardım və hüquqi məsləhət almaqda köməklik göstərmək;

3.2.2. qəyyumluq və himayəçilik sənədlərinin hazırlanmasına, tənha-ahıl vətəndaşların və əlilliyi olan şəxslərin internat evinə, sağlamlıq imkanları məhdud uşaqlara müvafiq xüsusi təhsil müəssisələrinə göndərilməsi üçün lazımi sənədlərin toplanmasına köməklik göstərmək; [4]

3.2.3. əlilliyi olan şəxslərə reabilitasiya xidməti göstərmək;

3.2.4. sağlamlıq imkanları məhdud uşaqların gündəlik həyatda lazım olan vərdiş və bacarıqlarını, böyük və kiçik motorika, ünsiyyət və koqnitiv bacarıqlarını inkişaf etdirmək;

3.2.5. sağlamlıq imkanları məhdud uşaqların sosial uyğunlaşmasına dəstək vermək;

3.2.6. sağlamlıq imkanları məhdud uşaqların inkişafı üçün valideynlərə müvafiq məsləhətlər vermək, o cümlədən zəruri yardımçı cihaz və vasitələrdən istifadəni öyrətmək;

3.2.7. ailənin sosial inkluziyasına köməklik göstərmək;

3.2.8. sağlamlıq imkanları məhdud uşaqların ehtiyaclarının ödənilməsi və problemlərinin həlli məqsədi ilə müvəkkillik fəaliyyətini həyata keçirmək.

3.3. Sosial xidmətçi tərəfindən göstərilən xidmətlərə aşağıdakılar daxildir:

3.3.1. yemək hazırlanmasına kömək etmək (o cümlədən diyetik yeməklər);

3.3.2. özünə qulluq edə bilməyən xəstələri yedizdirmək və qabları yumaq;

3.3.3. şəxsin çimizdirilməsinə, saçlarının daranmasına yardım etmək;

3.3.4. yataq dəstlərini dəyişdirmək, yataq və geyim əşyalarını yumaq və ütüləmək;

3.3.5. yataq və geyim əşyalarını camaşırxanaya, kimyəvi təmizləmə məntəqəsinə (əgər camaşırxana və kimyəvi təmizləmə məntəqəsi varsa) aparıb-gətirmək;

3.3.6. paltarların xırda təmirini etmək;

3.3.7. mənzili yığışdırmaq və təmizləmək;

3.3.8. zəruri ərzaq, sənaye və məişət mallarını almaq;

3.3.9. mənzil pulunun və digər kommunal xərclərin ödənilməsini təşkil etmək;

3.3.10. istiliyə, yanacağa, təmirə olan ehtiyacların ödənilməsi məqsədi ilə aidiyyəti təşkilatlarla əlaqə saxlamaq;

3.3.11. həyətyanı sahəni nizama salmaq;

3.3.12. evə həkim çağırmaq, həkimin təyinatı ilə aptekdən dərman almaq, həkim müayinəsinə aparıb-gətirmək;

3.3.13. sosial xidmətə götürülmüş vətəndaş vəfat etdikdə, dəfni ilə bağlı məsələlərin həllinə köməklik göstərmək.

3.4. Sosial işçi xidmətə götürülmüş şəxsə fərdi plana uyğun olaraq xidmət göstərir. Əlilliyi olan şəxslərə xidmət göstərilməsi vaxtı reabilitasiya xidmətinin növündən asılı olaraq tərəflərin razılığı ilə müəyyən edilir. [5]

3.5. Evdə (səyyar) sosial xidmət ödənişsiz, qismən ödənişli və tam ödənişli əsaslarla göstərilir. Çətin həyat şəraitində olan şəxslərə (ailələrə) evlərdə (səyyar) sosial xidmət zəmanət verilmiş həcmdə ödənişsiz göstərilir.

3.6. Qismən ödənişli və tam ödənişli sosial xidmət tərəflər arasında bağlanmış sosial xidmət müqaviləsi əsasında həyata keçirilir.

3.7. Aşağıdakı hallarda evdə (səyyar) sosial xidmət göstərilməsi dayandırılır:

3.7.1. qismən ödənişli və tam ödənişli sosial xidmətin göstərilməsi ilə əlaqədar sosial xidmət müqaviləsində nəzərdə tutulan hallarda;

3.7.2. sosial xidmətə ehtiyacı olan şəxs əmək qabiliyyətli qohumları və ya qanuni nümayəndələri ilə eyni yaşayış məntəqəsində yaşamağa başladıqda;

3.7.3. tənha ahıllar, əlilliyi olan şəxslər dövlət sosial xidmət müəssisələrinə yerləşdirildikdə;

3.7.4. əlilliyi olan şəxslərin reabilitasiyası başa çatdıqda;

3.7.5. sosial xidmətə ehtiyacı olan şəxs vəfat etdikdə.

 


İSTİFADƏ OLUNMUŞ MƏNBƏ SƏNƏDLƏRİNİN SİYAHISI

 

1.       28 noyabr 2016-cı il tarixli 488 nömrəli Azərbaycan Respublikası Nazirlər Kabinetinin Qərarı (Xalq qəzeti, 29 noyabr 2016-cı il, 264, Azərbaycan Respublikasının Qanunvericilik Toplusu, 2016-cı il, 11, maddə 1976)

2.       7 mart 2019-cu il tarixli 80 nömrəli Azərbaycan Respublikası Nazirlər Kabinetinin Qərarı (Xalq qəzeti, 14 mart 2019-cu il, 59, Azərbaycan Respublikasının Qanunvericilik Toplusu, 2019-cu il, 3, maddə 514)

3.       9 iyul 2019-cu il tarixli 297 nömrəli Azərbaycan Respublikası Nazirlər Kabinetinin Qərarı (Xalq qəzeti, 13 iyul 2019-cu il, 150)

 

QƏRARA EDİLMİŞ DƏYİŞİKLİK VƏ ƏLAVƏLƏRİN SİYAHISI

 



[1] 7 mart 2019-cu il tarixli 80 nömrəli Azərbaycan Respublikası Nazirlər Kabinetinin Qərarı (Xalq qəzeti, 14 mart 2019-cu il, 59, Azərbaycan Respublikasının Qanunvericilik Toplusu, 2019-cu il, 3, maddə 514) ilə Evdə (səyyar) sosial xidmətin göstərilməsi Qaydasının 1.1-ci, 1.3-cü, 2.1-ci bəndlərdə və 3.2.3-cü, 3.7.3-cü və 3.7.4-cü yarımbəndlərdə ismin müvafiq hallarında əlillərə və sağlamlıq imkanları məhdud uşaqlar sözləri ismin müvafiq hallarında əlilliyi olan şəxslər sözləri ilə əvəz edilmişdir.

 

[2] 28 noyabr 2016-cı il tarixli 488 nömrəli Azərbaycan Respublikası Nazirlər Kabinetinin Qərarı (Xalq qəzeti, 29 noyabr 2016-cı il, 264, Azərbaycan Respublikasının Qanunvericilik Toplusu, 2016-cı il, 11, maddə 1976) ilə 2.1-ci bənddə Dövlət Sosial Təminat Xidmətinin şəhər, rayon əhalisinin sosial müdafiəsi mərkəzlərinə (bundan sonra - Mərkəz) sözləri Dövlət Sosial Müdafiə Fondunun şəhər, rayon şöbələrinə (bundan sonra - Şöbə) sözləri ilə əvəz edilmişdir.

 

9 iyul 2019-cu il tarixli 297 nömrəli Azərbaycan Respublikası Nazirlər Kabinetinin Qərarı (Xalq qəzeti, 13 iyul 2019-cu il, 150) ilə Evdə (səyyar) sosial xidmətin göstərilməsi Qaydasının 2.1-ci bəndinə (bundan sonra Şöbə) sözlərindən sonra və ya DOST mərkəzlərinə (bundan sonra Mərkəz) sözləri əlavə edilmişdir.

 

[3] 28 noyabr 2016-cı il tarixli 488 nömrəli Azərbaycan Respublikası Nazirlər Kabinetinin Qərarı (Xalq qəzeti, 29 noyabr 2016-cı il, 264, Azərbaycan Respublikasının Qanunvericilik Toplusu, 2016-cı il, 11, maddə 1976) ilə 2.2-ci, 2.3-cü və 2.4-cü bəndlərdə ismin müvafiq hallarında Mərkəz sözü ismin müvafiq hallarında Şöbə sözü ilə əvəz edilmişdir.

 

9 iyul 2019-cu il tarixli 297 nömrəli Azərbaycan Respublikası Nazirlər Kabinetinin Qərarı (Xalq qəzeti, 13 iyul 2019-cu il, 150) ilə Evdə (səyyar) sosial xidmətin göstərilməsi Qaydasının 2.2-ci, 2.3-cü və 2.4-cü bəndlərinə ismin müvafiq hallarında Şöbə sözündən sonra ismin müvafiq hallarında və ya Mərkəz sözləri əlavə edilmişdir.

 

[4] 7 mart 2019-cu il tarixli 80 nömrəli Azərbaycan Respublikası Nazirlər Kabinetinin Qərarı (Xalq qəzeti, 14 mart 2019-cu il, 59, Azərbaycan Respublikasının Qanunvericilik Toplusu, 2019-cu il, 3, maddə 514) ilə Evdə (səyyar) sosial xidmətin göstərilməsi Qaydasının 3.2.2-ci yarımbəndində əlillərin sözü əlilliyi olan şəxslərin sözləri ilə əvəz edilmişdir.

 

[5] 7 mart 2019-cu il tarixli 80 nömrəli Azərbaycan Respublikası Nazirlər Kabinetinin Qərarı (Xalq qəzeti, 14 mart 2019-cu il, 59, Azərbaycan Respublikasının Qanunvericilik Toplusu, 2019-cu il, 3, maddə 514) ilə Evdə (səyyar) sosial xidmətin göstərilməsi Qaydasının 3.4-cü bəndin ikinci cümləsində Əlillərə və sağlamlıq imkanları məhdud uşaqlara sözləri Əlilliyi olan şəxslərə sözləri ilə əvəz edilmişdir.