Bakı şəhərinin 8-ci kilometr qəsəbəsində Daxili İşlər Nazirliyinin keçmiş xüsusi təyinatlı polis dəstəsinin bazasında yerləşən sabiq əməkdaşları haqqında

AZƏRBAYCAN RESPUBLİKASI PREZİDENTİNİN FƏRMANI

Daxili İşlər Nazirliyinin keçmiş xüsusi təyinatlı polis dəstəsinin sabiq əməkdaşları son günlər Bakı şəhərinin 8-ci kilometr qəsəbəsində yerləşərək dövlətin qanunlarına itaətsizlik edirlər.

Yaranmış vəziyyətdə qardaş qırğınının qarşısının alınması, respublikada sabitliyin qorunması, dinc əhalinin təhlükəsizliyinin təmin edilməsi məqsədi ilə, habelə humanizm prinsiplərini rəhbər tutaraq qərara alıram:

1. Daxili İşlər Nazirliyinin keçmiş xüsusi təyinatlı polis dəstəsinin Bakı şəhərinin 8-ci kilometr qəsəbəsindəki bazasında yerləşən sabiq əməkdaşlarına təklif edilsin ki, silahlarını, döyüş sursatını və digər hərbi ləvazimatı təxirə salınmadan təhvil versinlər.

2. Müəyyən edilsin ki, silahlarını könüllü surətdə təhvil verib keçmiş xüsusi təyinatlı polis dəstəsinin Bakı şəhərinin 8-ci kilometr qəsəbəsində yerləşən bazasını tərk edən şəxslər cinayət məsuliyyətinə cəlb olunmasınlar və onlar haqqında qanunvericiliklə nəzərdə tutulan digər tədbirlər tətbiq edilməsin.

Azərbaycan Respublikasının Prezidenti

Heydər ƏLİYEV.

Bakı şəhəri, 16 mart 1995-ci il.

№ 298.