Azərbaycan Respublikasının                                                      Azərbaycan Respublikası

Ədliyyə Nazirliyi tərəfindən                                                          Əmək və Əhalinin Sosial

“ 08” noyabr 1999-cu il                                                         Müdafiəsi Nazirliyi

tarixdə qeydə almışdır:                                                                  kollegiyasının        

                                                                                                           "28" oktyabr 1999-cu il

qeydiyyat № 193                                                                                     tarixli 22-4 №-li qərarı ilə

                                                                                                          təsdiq edilmişdir

Nazir_____________ S .C. HƏSƏNOVA                                          Nazir___________ Ə. NAĞIYEV

Təhsil sahəsi işçilərinin qulluqçu

 vəzifələrini Vahid Tarif İxtisas Sorğu

 Kitabçasına (hissə 75) əlavələr [1]

ELMİ KATİB

Vəzifə borcu:

Elmi Şuranın iş planının layihəsini hazırlayır. Elmi Şuranın işini və iclasların keçirilməsi təsdiq edilmiş plana uyğun təşkil edir.

Elmi Şuranın iclaslarını hazırlayır iclasda müzakirə olunacaq məsələlərə dair lazımi materialları şuranın üzvlərinə əvvəlcədən çatdırır. Elmi Şurada baxılacaq məsələlərə dair uyğun sənədləri yoxlayıb qəbul edir.

Elmi Şuranın protokollarını tərtib edir və sədrlə birlikdə imzalayır. Həmin protokolların və digər lazımi sənədlərin saxlanılmasını təmin edir.

Ali təhsil (elmi-tədqiqat) müəssisəsinin əsas iş istiqamətlərinin müəyyənləşdirilməsi, onun fəaliyyətinin səmərəliliyinin yüksəldilməsi, əməyin təşkilinin yaxşılaşdırılması üzrə planların və proqramların işlənməsində əlaqələndirməni təmin edir.

Elmi adların verilməsi ilə əlaqədar Ali Attestasiya Komissiyası ilə əlaqə saxlayır.

Elmi ezamiyyədə olan əməkdaşların hesabatlarını müvafiq qaydada qəbul edir.

Respublikanın, eləcə də xarici ölkələrin təhsil müəssislərindən daxil olan elmi işlərə rəylərin yazılmasını təşkil edir.

Elmi Şuranın qərarlarının yerinə yetirilməsinə nəzarət edir.

İlin sonunda Elmi Şuranın işi haqqında hesabat hazırlayır və şuranın sədrinə təqdim edir.

Bilməlidir:

Dövlət və hökumətin elm və təhsilə aid qanunlarını, o cümlədən "Azərbaycan Respublikası Təhsil Qanunu"nu, qərar və sərəncamlarını; Təhsil Nazirliyi tərəfindən təsdiq edilmiş əsasnamə, təlimat, tövsiyə, normativ aktları və digər sənədləri; başqa təşkilat və müəssisələrlə birgə iş yerinə yetirilərkən müqavilənin tərtibi məsələlərini, elmi və elmi-pedaqoji kadrların əməyinin təşkili və elmi-tədqiqat işlərinin idarə edilməsi metodlarını, kargüzarlıq işinin təşkili üzrə rəhbər materialları, əmək mühafizəsi və təhlükəsizlik texnikasının, istehsalat santiriyasının və yanğından mühafizənin qayda və normalarını

Ödəniş dərəcələrinə ixtisas tələbləri:

17-ci dərəcə-elmlər doktoru, professor;

16-cı dərəcə-elmlər namizədi, professor;

15-ci dərəcə-elmlər namizədi, dosent;

14-cü dərəcə-elmlər namizədi, baş müəllim.

Xüsusi peşə məktəbində rejim üzrə nəzarətçi

Vəzifə borcu:

Peşə məktəbində tərbiyə olunan şagirdlər üçün dərsdən sonra müəyyən edilmiş gün rejiminin yerinə yetirilməsini təmin edir, şagirdlərin daxili davranış qaydalarına riayət etmələrinə nəzarət edir. Davranış qaydaları ilə əlaqədar şagirdlərlə profilaktik iş aparır, şagirdlərin davranış qaydalarında maddi pozuntular yarandığı hallarda məktəbin rəhbərliyinə məlumat verir.

Məktəbdə tərbiyə olunan hər bir şagirdə diqqət və qayğı göstərir. Şagirdlərin asudə vaxtlarının daha səmərəli keçirilməsi üçün tədbirlər planının hazırlanmasında iştirak edir.

Hər bir şagirdin psixologiyasına uyğun münasibət yaratmağı bacarmalı və onunla şəxsiyyət kimi davranmalı və cəmiyyətə yararlı insna tərbiyələndirməlidir. Şagirdlərdə əməyə məhəbbət ruhu yaratmalıdır.

Şagirdlər tərəfindən məktəbin bina, qurğu və digər vasitələrinin qorunması onların vaxtından əvvəl sıradana çıxdarılması üzrə tərbiyəvi iş aparır. Müəyyən işlər görülərkən əməyin mühafizəsi və təhlükəsizlik texnikası tələblərinin şagirdlər tərəfindən yerinə yetirilməsinə nəzarət edir.

Qadağan olunmuş əşya və məlumatların şagirdlər tərəfindən əldə edilməsinin və ya onlara verilməsinin, eləcə də onlardan istifadə edilməsinin qarşısını alır.

Bilməlidir:

"Təhsil haqqında" Azərbaycan Respublikasının Qanununu, xüsusi peşə məktəbinə dair qərar, göstəriş və təlimatları, şagirdlərlə davranış qaydalarını, tərbiyə üsul və metodlarını, məktəbdə nəzarət etdiyi qrupdakı şagirdlərin ad və soy adını, onların psixologiyasını, fərdi xüsusiyyətlərini, peşə məktəblərində gigiyena və təhlükəsizlik texnikası qaydalarını.

Ödəniş dərəcələrinə ixtisas tələbləri:

7-ci dərəcə-orta ixtisas təhsili. ən azı bir il iş stajı;

8-ci dərəcə-orta ixtisas təhsilli, 3 ildən yuxarı iş stajı.

AZƏRBAYCAN RESPUBLİKASI ƏMƏK VƏ ƏHALİNİN SOSİAL MÜDAFİƏSİ NAZİRLİYİ

QƏRAR

№ 22-4

28 oktyabr 1999-cu il

Təhsil sahəsi işçilərinin qulluqçu vəzifələrinin Vahid Tarif İxtisas Sorğu kitabçasına (hissə 75) əlavələr edilməsi barədə

Azərbaycan Respublikası Nazirlər Kabinetinin “Fəhlə peşələri və qulluqçu vəzifələri üzrə Ümumrespublika təsnifatının və fəhlə peşələri və qulluqçu vəzifələrinin Vahid Tarif İxtisas Sorğu kitabçalarının işlənib hazırlanması haqqında” 25 aprel 1995-ci il tarixli 93 saylı qərarına uyğun olaraq Azərbaycan Respublikası Əmək və Əhalinin Sosial Müdafiəsi Nazirliyinin kollegiyası

QƏRARA ALIR:

Azərbaycan Respublikası Təhsil Nazirliyinin təqdim etdiyi “Təhsil sahəsi işçilərinin qulluqçu vəzifələrinin Vahid Tarif İxtisas Sorğu kitabçası”nın (hissə 75) “Ali məktəblər” bölməsinə “Rejim üzrə nəzarətçi” vəzifələri əlavə edilsin (əlavə olunur).

Kollegiyanın sədri                                                              Ə. NAĞIYEV

İSTİFADƏ OLUNMUŞ MƏNBƏ SƏNƏDLƏRİNİN SİYAHISI

1. 20 dekabr 2017-ci il tarixli 18-1 nömrəli Azərbaycan Respublikası Əmək və Əhalinin Sosial Müdafiəsi Nazirliyi Kollegiyasının Qərarı

BÜLLETENƏ EDİLMİŞ DƏYİŞİKLİK VƏ ƏLAVƏLƏRİN SİYAHISI