"Xüsusi mühafizə olunan təbiət əraziləri və obyektləri haqqında" Azərbaycan Respublikası Qanununun tətbiqi ilə əlaqədar "Ətraf mühitin mühafizəsi haqqında" Azərbaycan Respublikasının Qanununa dəyişikliklər və əlavələr edilməsi barədə

AZƏRBAYCAN RESPUBLİKASININ QANUNU

Azərbaycan Respublikasının Milli Məclisi qərara alır:

I. "Ətraf mühitin mühafizəsi haqqında" Azərbaycan Respublikasının Qanununa (Azərbaycan Respublikasının qanunvericilik toplusu, 1999-cu il, № 8, maddə 472; 2001-ci il, № 3, maddə 148) aşağıdakı dəyişikliklər və əlavələr edilsin:

1. 28-ci maddənin 1-ci hissəsinin 1.7-ci bəndində "təbiət ərazilərinin" sözlərindən sonra "və obyektlərinin" sözləri, 1.10-cu bəndində "keçirilməsinə" sözündən sonra "dövlət kadastrının aparılmasına" sözləri əlavə edilsin;

2. 51-ci maddəyə aşağıdakı məzmunda 5-ci hissə əlavə edilsin:

"5. Dövlət təbiət qoruqları sahəsində idarəetməni həyata keçirən orqanlar təsərrüfat obyektlərinin və digər obyektlərin yerləşdirilməsi layihələrinin və sxemlərinin dövlət ekoloji ekspertizasında iştirak edirlər.";

3. 51-ci maddənin 5-ci hissəsi 6-cı hissə hesab edilsin;

4. 62-ci maddədə:

maddənin adına "əraziləri" sözündən sonra "və obyektləri" sözləri əlavə edilsin;

1-ci hissədə "estetik əhəmiyyət" sözləri "estetik və sağlamlaşdırma əhəmiyyəti" sözləri ilə, "obyektlərdən" sözü "obyektlərindən" sözü ilə, "və su məkanı (akvatoriya) sahələridir" sözləri "su (akvatoriya) sahələri və onların üzərindəki atmosfer məkanıdır" sözləri ilə əvəz edilsin;

4-cü hissədə "əraziləri" sözündən sonra "və obyektləri" sözləri əlavə edilsin, "regionlararası, dövlət" sözləri "respublika, bölgə" sözləri ilə əvəz edilsin.

II. Bu Qanun dərc edildiyi gündən qüvvəyə minir.

Heydər ƏLİYEV,
Azərbaycan Respublikasının Prezidenti

Bakı şəhəri, 19 aprel 2002-ci il
             № 308-IIQD