AZƏRBAYCAN RESPUBLİKASI

XARİCİ İŞLƏR NAZİRLİYİNİN KOLLEGİYASI [1]

QƏRAR

№ Q/04-15

Bakı şəhəri,                                                                            “ 18” mart 2015-сi il

“Azərbaycan Respublikasında xarici kütləvi informasiya vasitələri nümayəndələrinin akkreditəsi Qaydaları”nın təsdiq edilməsi haqqında

“Kütləvi informasiya vasitələri haqqında” Azərbaycan Respublikası Qanununun tətbiq edilməsi barədə” Azərbaycan Respublikası Prezidentinin 2000-ci il 8 fevral tarixli 277 nömrəli Fərmanının 2-ci hissəsinin yeddinci abzasını rəhbər tutaraq və Azərbaycan Respublikası Prezidentinin 2004-cü il 29 yanvar tarixli 16 nömrəli Fərmanı ilə təsdiq edilmiş “Azərbaycan Respublikasının Xarici İşlər Nazirliyi haqqında Əsasnamə”nin 16-cı bəndinə uyğun olaraq Azərbaycan Respublikası Xarici İşlər Nazirliyinin Kollegiyası QƏRARA ALIR:

1. “Azərbaycan Respublikasında xarici kütləvi informasiya vasitələri nümayəndələrinin akkreditəsi Qaydaları” təsdiq edilsin (əlavə olunur).

2. Hüquqi təminat idarəsinin rəisi (H.Hüseynov) bu Qərarın üç gün müddətində Azərbaycan Respublikasının Hüquqi Aktların Dövlət Reyestrinə daxil edilməsi üçün Azərbaycan Respublikasının Ədliyyə Nazirliyinə göndərilməsini təmin etsin.

Azərbaycan Respublikasında xarici kütləvi informasiya vasitələri nümayəndələrinin akkreditəsi

QAYDALARI

1. Ümumi müddəalar

1.1.                  Bu Qaydalar Azərbaycan Respublikasında jurnalist fəaliyyəti ilə məşğul olmaq və bu məqsədlə çəkiliş aparmaq istəyən xarici kütləvi informasiya vasitələrinin müxbir və operatorlarının (bundan sonra – “xarici KİV nümayəndələri”) akkreditəsi qaydalarını müəyyən edir.

1.2.                  Xarici KİV nümayəndələrinin akkreditəsi “Kütləvi informasiya vasitələri haqqında” Azərbaycan Respublikasının Qanunu, müvafiq dövlətlərarası müqavilələr və bu Qaydalar ilə tənzimlənir.

1.3.                  “Kütləvi informasiya vasitələri haqqında” Azərbaycan Respublikası Qanununun 53-cü maddəsinin üçüncü hissəsinə əsasən xarici KİV nümayəndələrinin Azərbaycan Respublikasında akkreditəsi Azərbaycan Respublikasının Xarici İşlər Nazirliyi (bundan sonra – “XİN”) tərəfindən həyata keçirilir.

1.4.                  Azərbaycan Respublikasının kütləvi informasiya vasitələrinin nümayəndə­lərinin akkreditəsinə öz ərazisində xüsusi məhdudiyyətlər qoymuş dövlətin kütləvi informasiya vasitələrinin nümayəndələrinə münasibətdə cavab olaraq Azərbaycan Respublikası ərazisində eyni məhdudiyyətlər qoyula bilər.

2. Xarici KİV nümayəndələrinin akkreditəsi barədə müraciətlərə baxılması

2.1.                  Xarici KİV nümayəndələrinin akkreditəsi üçün aşağıdakı sənədlər tələb olunur:

2.1.1.            xarici KİV nümayəndələrinin təmsil etdiyi kütləvi informasiya vasitəsi rəhbərinin və ya onu əvəz edən şəxsin XİN-ə müraciət məktubu;

2.1.2.            xarici KİV nümayəndələrinin ərizə-anketi (Əlavə);

2.1.3.            iki ədəd 3x4 sm ölçüdə rəngli fotoşəkil;

2.1.4.            xarici KİV nümayəndələrinin pasportu və ya digər sərhədkeçmə sənədinin (əgər xarici KİV nümayəndələri Azərbaycan Respublikasının vətəndaşlarıdırsa, Azərbaycan Respublikası vətəndaşının şəxsiyyət vəsiqəsinin) surəti;

2.1.5.            xidməti vəsiqənin surəti;

2.1.6.            tərcümeyi-hal.

2.2.                  Xarici KİV nümayəndələrinin akkreditəsi üçün tələb olunan sənədlər XİN-ə poçt, Azərbaycan Respublikasının diplomatik nümayəndəlikləri və ya konsulluqları, XİN-in internet saytındakı elektron xidmət vasitəsilə və ya şəxsən təqdim edilə bilər.

2.3.                  Xarici KİV nümayəndələrinin akkreditəsi barədə müraciətə 30 (otuz) gün ərzində baxılır və baxılmanın nəticəsi müsbət olduğu təqdirdə, xarici KİV nümayəndələrinə akkreditə kartı  verilir.

2.4.                  Akkreditə kartı etibarlı olduğu dövr ərzində onun sahibinə Azərbaycan Respublikasında jurnalist fəaliyyəti ilə məşğul olmaq hüququ verir.

2.5.                  Xarici KİV nümayəndələrinin akkreditəsi barədə müraciətə baxılmanın nəticəsinə dair məlumat XİN, yaxud Azərbaycan Respublikasının diplomatik nümayəndəlikləri və ya konsulluqları tərəfindən müraciət edən tərəfə bildirilir.

2.6.                  Xarici KİV nümayəndələrinin akkreditəsi peşə fəaliyyətini həyata keçirmələri üçün tələb olunan, lakin 1 (bir) ildən artıq olmayan müddətə olur. Akkreditə uzunmüddətli və qısamüddətli olur. Uzunmüddətli akkreditə 1 (bir) illik, qısamüddətli akkreditə isə konkret səfər müddətinə olur.

2.7.                  Xarici KİV nümayəndələrinin akkreditə müddəti bitəndən sonra akkreditə müddətinin uzadılması və ya yenidən akkreditə üçün xarici kütləvi informasiya vasitəsinin XİN-ə müraciət etməsi tələb olunur.

2.8.                  Xarici KİV nümayəndələrinin akkreditəsindən aşağıdakı hallarda imtina olunur:

2.8.1.            təqdim edilmiş sənədlər bu Qaydaların 2.1-ci bəndinə uyğun olmadıqda;

2.8.2.            saxta və ya yanlış məlumat təqdim edildikdə;

2.8.3.            xarici KİV nümayəndələri Ermənistan Respublikası tərəfindən Azərbaycan Respublikasının işğal olunmuş ərazilərinə XİN-in razılığı olmadan səfər etdikdə;

2.8.4.            xarici KİV nümayəndələrinin Azərbaycan Respublikasının ərazi bütövlüyünə, müstəqilliyinə, mənafeyinə və suverenliyinə qarşı fəaliyyəti aşkar edildikdə.

2.9.                  Akkreditə olunmuş xarici KİV nümayəndələri akkreditə kartını XİN-dən şəxsən təhvil alırlar.

2.10.              Xarici KİV nümayəndələri akkreditə kartını itirdikdə dərhal XİN-ə məlumat verməlidirlər. Akkreditə kartının dublikatının verilməsi barədə müraciətə 3 (üç) iş günü ərzində baxılır. Akkreditə kartının dublikatının verilməsi üçün aşağıdakı sənədlər tələb olunur:

2.10.1.        xarici KİV nümayəndələrinin akkreditə kartını itirdiyinə dair ərizəsi;

2.10.2.        iki ədəd 3x4 sm ölçüdə rəngli fotoşəkil.

3. Xarici KİV nümayəndələrinin akkreditəsinin ləğv edilməsi

3.1.                  Akkreditə olunmuş xarici KİV nümayəndələri tərəfindən akkreditə qaydaları pozulduqda, Azərbaycan Respublikasının ərazi bütövlüyünə, müstəqilliyinə, mənafeyinə və suverenliyinə qarşı fəaliyyət həyata keçirildikdə, Ermənistan Respublikası tərəfindən Azərbaycan Respublikasının işğal olunmuş ərazilərinə XİN-in razılığı olmadan səfər edildikdə, yaxud təhrif olunmuş və ya həqiqətə uyğun olmayan məlumatlar yayıldıqda və ya bu məhkəmənin qanuni qüvvəyə minmiş qərarı ilə təsdiq olunduqda, XİN tərəfindən xarici KİV nümayəndələrinin akkreditəsi ləğv edilir.

3.2.                  Xarici KİV nümayəndələrinin peşə fəaliyyəti vaxtından əvvəl bitdikdə, akkreditə kartının üzərində göstərilmiş etibarlılıq müddəti qurtardıqda və ya akkreditə ləğv edildikdə akkreditə kartı XİN-ə təhvil verilir.

3.3.                  Əcnəbi və ya vətəndaşlığı olmayan xarici KİV nümayəndələrinin Azərbaycan Respublikasına gəlməsi, qeydiyyata alınması, yaşamaq üçün icazə alması və getməsi Azərbaycan Respublikasının Miqrasiya Məcəlləsi ilə tənzimlənir.

İSTİFADƏ OLUNMUŞ MƏNBƏ SƏNƏDLƏRİNİN SİYAHISI

1. 1 avqust 2022-ci il tarixli Q/04-22 nömrəli Azərbaycan Respublikası Xarici İşlər Nazirliyi Kollegiyasının Qərarı (Hüquqi Aktların Dövlət Reyestrinin qeydiyyat nömrəsi 15202208010422, Hüquqi Aktların Dövlət Reyestrinə daxil edildiyi tarix 11 avqust 2022-ci il)

QƏRARA EDİLMİŞ DƏYİŞİKLİK VƏ ƏLAVƏLƏRİN SİYAHISI