Barama istehsalı ilə məşğul olan şəxslərə barama emalı və ipək istehsalı müəssisələrinin qəbul etdiyi bütün növ yaş baramanın hər kiloqramına görə verilən subsidiyanın məbləğinin müəyyən edilməsi və “Barama istehsalı ilə məşğul olan şəxslərə barama emalı və ipək istehsalı müəssisələrinin qəbul etdiyi bütün növ yaş baramanın hər kiloqramına görə subsidiyanın verilmə Qaydası”nın təsdiq edilməsi haqqında [1]

AZƏRBAYCAN RESPUBLİKASI NAZİRLƏR KABİNETİNİN QƏRARI

“Azərbaycan Respublikasında ipəkçiliyin inkişafına dövlət dəstəyi haqqında” Azərbaycan Respublikası Prezidentinin 2016-cı il 15 sentyabr tarixli 2337 nömrəli Sərəncamının 2.1-ci bəndinin icrasını təmin etmək məqsədi ilə Azərbaycan Respublikasının Nazirlər Kabineti qərara alır:

1. Barama istehsalı ilə məşğul olan şəxslərə barama emalı və ipək istehsalı müəssisələrinin qəbul etdiyi bütün növ yaş baramanın (əyrilən və karapaçax barama istisna olmaqla) hər kiloqramına görə verilən subsidiyanın məbləği 5 (beş) manat müəyyən edilsin.

2. “Barama istehsalı ilə məşğul olan şəxslərə barama emalı və ipək istehsalı müəssisələrinin qəbul etdiyi bütün növ yaş baramanın hər kiloqramına görə subsidiyanın verilmə Qaydası” təsdiq edilsin (əlavə olunur).

3. Azərbaycan Respublikasının Maliyyə Nazirliyi bu qərarın icrası ilə bağlı tələb olunan maliyyə vəsaitinin ayrılmasını müəyyən olunmuş qaydada təmin etsin.

4. Bu qərarda dəyişikliklər Azərbaycan Respublikası Prezidentinin 2002-ci il 24 avqust tarixli 772 nömrəli Fərmanı ilə təsdiq edilmiş “İcra hakimiyyəti orqanlarının normativ hüquqi aktlarının hazırlanması və qəbul edilməsi qaydası haqqında Əsasnamə”nin 2.6-1-ci bəndinə uyğun edilə bilər.

Azərbaycan Respublikasının Baş naziri   Artur Rasi-zadə

Bakı şəhəri, 10 mart 2017-ci il

     № 85

Barama istehsalı ilə məşğul olan şəxslərə barama emalı və ipək istehsalı müəssisələrinin qəbul etdiyi bütün növ yaş baramanın hər kiloqramına görə subsidiyanın verilmə

QAYDASI

1. Ümumi müddəalar

1.1. Bu Qayda “Azərbaycan Respublikasında ipəkçiliyin inkişafına dövlət dəstəyi haqqında” Azərbaycan Respublikası Prezidentinin 2016-cı il 15 sentyabr tarixli 2337 nömrəli Sərəncamının 2.1-ci bəndinin icrasını təmin etmək məqsədi ilə hazırlanmışdır və barama istehsalı ilə məşğul olan şəxslərə (bundan sonra – barama istehsalçıları) barama emalı və ipək istehsalı müəssisələrinin qəbul etdiyi bütün növ yaş baramanın (əyrilən və karapaçax barama istisna olmaqla) hər kiloqramına görə subsidiyanın verilmə qaydasını müəyyən edir.

1.2. Barama istehsalçılarına verilən barama toxumunun, tut ipəkqurdunun və tut ağacı (çəkil) tinglərinin dəyəri Azərbaycan Respublikasının dövlət büdcəsinin vəsaiti hesabına ödənilir.

1.3. Subsidiya barama istehsalı ilə məşğul olan hüquqi şəxslərin hesablaşma (cari) hesablarına və fiziki şəxslərin cari (xüsusi kart) hesablarına köçürülməklə ödənilir.

1.4. Barama istehsal edən fiziki şəxslərə barama emalı və ipək istehsalı müəssisələrinin qəbul etdiyi yaş baramanın miqdarına görə subsidiyanın verilməsi üçün ödəniş (plastik) kartlarının üç ildən bir hazırlanması xərcləri və onlara göstərilən bank xidmətlərinin dəyəri dövlət büdcəsinin vəsaiti hesabına ödənilməklə, “Kənd təsərrüfatı məhsullarının istehsalçılarına əkin sahəsinin becərilməsində istifadə etdiyi yanacaq və motor yağlarına, habelə buğda və çəltik əkininə görə dövlət büdcəsinin vəsaiti hesabına yardımların verilməsi Qaydaları”nın və “Aqrolizinq” Açıq Səhmdar Cəmiyyəti və digər hüquqi və fiziki şəxslər tərəfindən kənd təsərrüfatı məhsullarının istehsalçılarına mineral gübrələrin, biohumusun və pestisidlərin güzəştlə satılması Qaydaları”nın təsdiq edilməsi barədə” Azərbaycan Respublikası Nazirlər Kabinetinin 2007-ci il 15 fevral tarixli 32 nömrəli qərarının 7-ci hissəsi ilə müəyyən edilmiş qaydada həyata keçirilir.

2. Barama istehsalçılarına subsidiyanın verilməsinin təşkili

2.1. Rayon (şəhər) üzrə barama istehsalçılarına subsidiyanın verilməsi ilə bağlı işlərin təşkili Azərbaycan Respublikası Kənd Təsərrüfatı Nazirliyinin (bundan sonra – Kənd Təsərrüfatı Nazirliyi) dövlət aqrar inkişaf mərkəzi (bundan sonra - DAİM) tərəfindən həyata keçirilir. [2]

2.2. Barama istehsalçılarına barama emalı və ipək istehsalı müəssisələrinin qəbul etdiyi yaş baramanın miqdarına görə subsidiya “Kənd təsərrüfatı məhsullarının istehsalçılarına əkin sahəsinin becərilməsində istifadə etdiyi yanacaq və motor yağlarına, habelə buğda və çəltik əkininə görə dövlət büdcəsinin vəsaiti hesabına yardımların verilməsi Qaydaları”nın və “Aqrolizinq” Açıq Səhmdar Cəmiyyəti və digər hüquqi və fiziki şəxslər tərəfindən kənd təsərrüfatı məhsullarının istehsalçılarına mineral gübrələrin, biohumusun və pestisidlərin güzəştlə satılması Qaydaları”nın təsdiq edilməsi barədə” Azərbaycan Respublikası Nazirlər Kabinetinin 2007-ci il 15 fevral tarixli 32 nömrəli qərarı ilə yaradılmış Respublika Komissiyasının (bundan sonra - Respublika Komissiyası) qərarı əsasında verilir.

2.3. Barama istehsalçılarına subsidiyanın verilməsinin təşkili DAİM-in müvəkkil bankla bağladığı müqavilə əsasında həyata keçirilir. [3]

2.4. Subsidiyanın barama istehsalçılarının hesablarına köçürülməsi üçün DAİM Respublika Komissiyasının qərarına əsasən subsidiya veriləcək istehsalçıların siyahısını, bank rekvizitlərini və onlara veriləcək subsidiyanın məbləği barədə məlumatları müvəkkil bankın müəyyən etdiyi formada ona təqdim edir.

3. Barama istehsalçılarına barama toxumunun, tut ipəkqurdunun və tut ağacı (çəkil) tinglərinin paylanılması və subsidiyanın verilmə şərtləri

3.1. Barama istehsalçıları hər il fevralın 10-dək barama toxumuna, tut ipəkqurduna və tut ağacı (çəkil) tinglərinə olan tələbatları barədə məlumatları bu Qaydanın 1 nömrəli əlavəsinə uyğun formada Azərbaycan Respublikası Nazirlər Kabinetinin 2007-ci il 15 fevral tarixli 32 nömrəli qərarı ilə təsdiq edilmiş “Kənd təsərrüfatı məhsullarının istehsalçılarına əkin sahəsinin becərilməsində istifadə etdiyi yanacaq və motor yağlarına, habelə buğda və çəltik əkininə görə dövlət büdcəsinin vəsaiti hesabına yardımların verilməsi Qaydaları”na əsasən yaradılmış kənd ərazi komissiyalarına təqdim edirlər.

3.2. Kənd ərazi komissiyaları bu Qaydanın 3.1-ci bəndinə müvafiq olaraq təqdim edilmiş məlumatlar əsasında inzibati ərazi dairəsi üzrə barama toxumuna, tut ipəkqurduna və tut ağacı (çəkil) tinglərinə olan tələbata dair bu Qaydanın 2 nömrəli əlavəsinə uyğun formada icmal siyahını tərtib edib, fevralın 15-dək DAİM-ə göndərirlər.

3.3. DAİM təqdim edilmiş məlumatları dəqiqləşdirir və rayon (şəhər) üzrə bu Qaydanın 3 nömrəli əlavəsinə uyğun formada icmal siyahını tərtib edib, fevralın 25-dək Kənd Təsərrüfatı Nazirliyinə göndərir. [4]

3.4. Barama emalı və ipək istehsalı müəssisələri cari ildə tədarük olunacaq yaş baramanın həcminə dair məlumatları fevralın 25-dək Kənd Təsərrüfatı Nazirliyinə təqdim etməlidirlər.

3.5. Bu Qaydanın 3.3-cü və 3.4-cü bəndlərinə uyğun olaraq təqdim edilmiş məlumatların, tut yarpağı üzrə mövcud ehtiyatın həcminin və tədarük imkanlarının qiymətləndirilməsi, habelə rayonda (şəhərdə) təbii şərait və barama istehsalının iqtisadi səmərəliliyi nəzərə alınmaqla, rayon (şəhər) üzrə barama istehsalçılarına paylanılacaq barama toxumunun, tut ipəkqurdunun və tut ağacı (çəkil) tinglərinin ümumi miqdarı Kənd Təsərrüfatı Nazirliyi tərəfindən müəyyən edilir.

3.6. Rayon (şəhər) üzrə barama istehsalçılarına paylanılacaq barama toxumunun, tut ipəkqurdunun və tut ağacı (çəkil) tinglərinin miqdarı istehsalçıların tələbatının ümumi həcmindən az olduqda, Kənd Təsərrüfatı Nazirliyi paylanılacaq barama toxumunu, tut ipəkqurdunu və tut ağacı (çəkil) tinglərini istehsalçılar arasında onların tələbatının ümumi həcmindəki paylarına müvafiq olaraq bölüşdürür və bölgü əsasında paylanılmasını təmin edir.

3.7. Barama toxumu, tut ipəkqurdu və tut ağacı (çəkil) tingləri əldə etmək üçün müraciət etmiş barama istehsalçısı onları almaqdan imtina etdikdə, ona ayrılmış barama toxumu, tut ipəkqurdu və tut ağacı (çəkil) tingləri digər barama istehsalçılarına verilir.

3.8. Kənd Təsərrüfatı Nazirliyi bölgü əsasında barama istehsalçılarına paylanılan barama toxumu, tut ipəkqurdu və tut ağacı (çəkil) tingləri barədə bu Qaydanın 4 nömrəli əlavəsinə uyğun formada 2 nüsxədə icmal siyahını tərtib edib, bir nüsxəsini mayın 25-dək Respublika Komissiyasına və bir nüsxəsini müvafiq DAİM-ə göndərir.

3.9. Barama istehsalçılarına paylanılan barama toxumunun, tut ipəkqurdunun və tut ağacı (çəkil) tinglərinin dəyəri ilkin olaraq Dövlət Toxum Fondunun vəsaiti hesabına ödənilir. Sonra həmin vəsait dövlət büdcəsindən Dövlət Toxum Fondunun hesabına köçürülür.

3.10. Barama istehsalçısı barama emalı və ipək istehsalı müəssisələrinin qəbul etdiyi yaş baramanın miqdarına görə subsidiyanı almaq üçün bu Qaydanın 5 nömrəli əlavəsində göstərilən ərizə nümunəsini dolduraraq, iyunun 30-dək kənd ərazi komissiyasına təqdim edir. Ərizəyə aşağıdakı sənədlər əlavə olunmalıdır:

3.10.1. fiziki şəxslər üçün şəxsiyyət vəsiqəsinin, hüquqi şəxslər və hüquqi şəxs yaratmadan sahibkarlıq fəaliyyəti ilə məşğul olan şəxslər üçün VÖEN-in surəti;

3.10.2. barama istehsalında istifadə edilmiş barama toxumunun, tut ipəkqurdunun və tut ağacı (çəkil) tinglərinin təhvil-təslim aktının surəti;

3.10.3. istehsal edilmiş baramanın alqı-satqısına dair müqavilənin və kassa məxaric orderinin surəti;

3.10.4. bu Qaydanın 7 nömrəli əlavəsinə uyğun tərtib edilmiş yaş baramanın qəbulu qəbzi;

3.10.5. hüquqi şəxslərin möhürlə və onların səlahiyyətli nümayəndələrinin imzası ilə təsdiq edilmiş bank rekvizitləri.

3.11. Kənd ərazi komissiyası barama istehsalçıları tərəfindən təqdim edilmiş bu Qaydanın 3.10-cu bəndində qeyd olunan sənədləri baxılması üçün iyulun 5-dək DAİM-ə təqdim edir.

3.12. DAİM kənd ərazi komissiyalarından daxil olan sənədləri 10 (on) gün müddətində təhlil edir, dəqiqləşdirilməli halları yerində araşdırır, bu Qaydanın 6 nömrəli əlavəsinə uyğun 2 (iki) nüsxədən ibarət icmal siyahını tərtib edir və iyulun 15-dək Respublika Komissiyasına göndərir.

3.13. Respublika Komissiyası 15 (on beş) gün müddətində bu Qaydanın 3.12-ci bəndinə müvafiq olaraq təqdim edilmiş icmal siyahılar əsasında barama istehsalçılarına subsidiyanın verilməsi barədə qərar qəbul edir və həmin qərarı Azərbaycan Respublikasının Maliyyə Nazirliyinə və müvafiq DAİM-ə göndərir.

3.14. Azərbaycan Respublikasının Maliyyə Nazirliyi müvəkkil bank vasitəsilə iyulun 30-dan başlayaraq 30 (otuz) gün müddətində subsidiyanın barama istehsalçılarının bank hesabına köçürülməsini təmin edir.

4. Yekun müddəalar

4.1. DAİM barama istehsalçılarına barama emalı və ipək istehsalı müəssisələrinin qəbul etdiyi yaş baramanın miqdarına görə subsidiyanın verilməsi üçün ayrılmış büdcə vəsaitinin istifadəsi barədə məlumatları hər il noyabrın 30-dək rayon (şəhər) icra hakimiyyətinə təqdim edir.

4.2. Respublika Komissiyasının qərarına uyğun olaraq, subsidiya verilən barama istehsalçıları barədə məlumatlar Kənd Təsərrüfatı Nazirliyinin rəsmi internet saytında yerləşdirilir.

4.3. Barama istehsalçısı aldığı barama toxumundan və tut ipəkqurdundan barama istehsal etmədikdə, habelə tut ağacı (çəkil) tinglərini əkmədikdə, onların dəyərini Azərbaycan Respublikasının dövlət büdcəsinə ödəməlidir.

QƏRARA EDİLMİŞ DƏYİŞİKLİK VƏ ƏLAVƏLƏRİN SİYAHISI

1.       12 noyabr 2018-ci il tarixli 484 nömrəli Azərbaycan Respublikası Nazirlər Kabinetinin Qərarı (“Xalq” qəzeti, 14 noyabr 2018-ci il, № 256, Azərbaycan Respublikasının Qanunvericilik Toplusu, 2018-ci il, № 11, maddə 2434)

2.       [1] 02 sentyabr 2020-ci il tarixli 319 nömrəli Azərbaycan Respublikası Nazirlər Kabinetinin Qərarı (“Xalq” qəzeti, 04 sentyabr 2020-ci il, № 177, Azərbaycan Respublikasının Qanunvericilik Toplusu, 2020-ci il, № 9, maddə 1193)

İSTİFADƏ OLUNMUŞ MƏNBƏ SƏNƏDLƏRİNİN SİYAHISI