“Uşaqların dövlət və bələdiyyə tərəfindən yaradılan ailə tipli kiçik qrup evlərinə qəbulu, qrup evlərini tərk etməsi, qrup evlərində xidmətin təşkili, həmçinin qrup evlərində uşaqların təminatı və yaşayış şəraitinə dair Qaydalar”ın təsdiq edilməsi haqqında

AZƏRBAYCAN RESPUBLİKASI NAZİRLƏR KABİNETİNİN QƏRARI

Azərbaycan Respublikası Konstitusiyasının 119-cu maddəsinin səkkizinci abzasını rəhbər tutaraq, Azərbaycan Respublikasının Nazirlər Kabineti qərara alır:

“Uşaqların dövlət və bələdiyyə tərəfindən yaradılan ailə tipli kiçik qrup evlərinə qəbulu, qrup evlərini tərk etməsi, qrup evlərində xidmətin təşkili, həmçinin qrup evlərində uşaqların təminatı və yaşayış şəraitinə dair Qaydalar” təsdiq edilsin (əlavə olunur).

Əli ƏSƏDOV

Azərbaycan Respublikasının Baş naziri

Bakı şəhəri, 26 aprel 2021-ci il

                       № 111

Uşaqların dövlət və bələdiyyə tərəfindən yaradılan ailə tipli kiçik qrup evlərinə qəbulu, qrup evlərini tərk etməsi, qrup evlərində xidmətin təşkili, həmçinin qrup evlərində uşaqların təminatı və yaşayış şəraitinə dair

QAYDALAR

1. Ümumi müddəalar

1.1. Bu Qaydalar “Dövlət və bələdiyyə tərəfindən yaradılan ailə tipli kiçik qrup evinin Nümunəvi Nizamnaməsi”nin təsdiq edilməsi və “Ailə tipli kiçik qrup evinin Nümunəvi Nizamnaməsi”nin təsdiq edilməsi haqqında” Azərbaycan Respublikası Nazirlər Kabinetinin 2013-cü il 13 avqust tarixli 207 nömrəli Qərarının ləğv edilməsi barədə” Azərbaycan Respublikası Nazirlər Kabinetinin 2020-ci il 30 iyul tarixli 274 nömrəli Qərarının 3-cü hissəsinin icrası məqsədilə hazırlanmışdır və 18 yaşınadək əlilliyi müəyyən edilmiş şəxslər da daxil olmaqla valideynlərini itirmiş və ya valideyn himayəsindən məhrum olmuş uşaqların (bundan sonra - uşaqlar) dövlət və bələdiyyə tərəfindən yaradılan ailə tipli kiçik qrup evlərinə (bundan sonra - qrup evləri) qəbulu, qrup evlərini tərk etməsi, qrup evlərində uşaqlara xidmətin təşkili, həmçinin onların təminatı və yaşayış şəraiti ilə bağlı məsələləri müəyyən edir. [1]

1.2. Qrup evlərində uşaqların irqinə, etnik mənsubiyyətinə, dininə, dilinə, cinsinə, mənşəyinə görə ayrı-seçkiliyə yol verilmir.

2. Uşaqların qrup evlərinə qəbulu və qrup evlərini tərk etməsi

2.1. Uşaqlar qrup evlərinə 6 (altı) yaşınadək qəbul edilirlər.

2.2. Uşaqların mənafeyinin tələb etdiyi hallar istisna olmaqla qrup evlərinə qəbul zamanı qardaş və bacıların ayrılmasına yol verilmir.

2.3. “Sosial xidmət haqqında” Azərbaycan Respublikası Qanununun 10.2-ci maddəsinə əsasən uşaqların qrup evlərinə qəbul edilməsi üçün onların valideynlərindən biri, qohumları, digər qanuni nümayəndəsi (qəyyumu, himayəçisi), bələdiyyələr, qeyri-hökumət təşkilatları, habelə onların razılığı ilə digər şəxslər uşağın yaşayış yeri üzrə müvafiq yerli icra hakimiyyəti orqanına və ya bələdiyyəyə ərizə ilə müraciət edirlər. “İnzibati icraat haqqında” Azərbaycan Respublikası Qanununun 30.5-ci və 32.2-1-ci maddələrinin tələbləri nəzərə alınmaqla ərizəyə aşağıdakı sənədlər əlavə olunur:

2.3.1. uşağın şəxsiyyətini təsdiq edən sənəd;

2.3.2. valideynin (qəyyumun, himayəçinin) şəxsiyyətini təsdiq edən sənədin surəti;

2.3.3. vəfat edən valideynin (valideynlərin) ölüm haqqında şəhadətnaməsinin surəti və ya bu barədə Azərbaycan Respublikası Ədliyyə Nazirliyinin rayon (şəhər) qeydiyyat şöbələrinin arayışı, valideynin (valideynlərin) xəbərsiz itkin düşmüş, fəaliyyət qabiliyyəti olmayan və ya fəaliyyət qabiliyyəti məhdudlaşdırılan hesab edilməsi, ölmüş elan olunması ilə bağlı məhkəmənin qanuni qüvvəyə minmiş qərarının surəti; [2]

2.3.4. valideyn (valideynlər) valideynlik hüququndan məhrum edilmişdirsə və ya valideynlik hüquqları məhdudlaşdırılmışdırsa, bu barədə məhkəmənin qanuni qüvvəyə minmiş qərarının surəti;

2.3.5. valideynlər boşanmışdırlarsa, nikahın pozulması haqqında şəhadətnamənin surəti;

2.3.6. valideynlərdən birinin və ya hər ikisinin həbsdə olduğu təqdirdə məhkəmənin müvafiq qərarının surəti;

2.3.7. valideyn (valideynlər) əlilliyi olan şəxsdirsə, əlilliyini təsdiq edən sənədin surəti; [3]

2.3.8. valideynin (valideynlərin) daşınmaz əmlak üzərində mülkiyyət hüququnu təsdiq edən daşınmaz əmlakın dövlət reyestrindən məlumat və valideynlər vəfat etmişdirlərsə onların ölümündən sonra qalmış əmlakın saxlanılmasına cavabdehlik daşıyan şəxslər haqqında məlumat;

2.3.9. uşağın ailə başçısını itirməyə görə əmək pensiyası, sosial müavinət alması barədə məlumatı əks etdirən müvafiq sənəd, aliment ayrılması barədə məhkəmənin qanuni qüvvəyə minmiş qərarının surəti;

2.3.10. yoluxucu xəstəliklərin daşıyıcısı olmaması və psixi sağlamlıq vəziyyəti barədə məlumat göstərilməklə uşağın sağlamlığı haqqında tibbi arayış.

2.4. Təqdim edilmiş sənədlərdə aradan qaldırılması mümkün olan çatışmazlıqlar aşkar edildikdə, bu barədə ərizəçiyə 1 (bir) iş günündən gec olmayaraq yazılı məlumat verilir və ya göndərilir. Ərizəçi həmin çatışmazlıqlar barədə məlumatı aldığı gündən ən geci 7 (yeddi) iş günü müddətində aradan qaldırmalıdır. Şəxsə sosial xidmətin göstərilməməsinin onun həyat və sağlamlığı üçün ciddi təhlükələr yaradacağı hallarda “Sosial xidmət haqqında” Azərbaycan Respublikası Qanununun 12.4-cü maddəsinə əsasən qeyd olunan müddət gözlənilmədən şəxs dərhal müvəqqəti sosial xidmətə götürülür.

2.5. Müraciətə daxil olduqdan 10 (on) iş günü müddətində yerli icra hakimiyyətinin qəyyumluq və himayə orqanları və ya bələdiyyə tərəfindən baxılaraq, uşağın qrup evinə qəbul edilməsi və ya bundan imtina olunması barədə qərar qəbul edilir.

2.6. Uşağın qrup evinə qəbul edilməsi və ya bundan imtina olunması barədə qərar 3 (üç) iş günü müddətində ərizəçiyə təqdim edilir (göndərilir). İmtina barədə qərarda imtinanın səbəbləri göstərilməlidir.Ərizəyə əlavə olunan sənədlər ərizəçiyə qaytarılır.

2.7. Aşağıdakı hallarda uşaq qrup evini müvəqqəti olaraq tərk edir:

2.7.1. yaxın qohumlarından birinin (bundan sonra - şəxs) qrup evinin direktoruna uşağı qısa müddətə müvəqqəti (mütəmadi qaydada hər həftənin sonunda və ya bayram günlərində) öz ailəsinə götürmək barədə müraciəti olduqda;

2.7.2. uşağın səhhətində onun qrup evində saxlanılmasına maneə yaradan dəyişiklik baş verməsi ilə əlaqədar müvafiq müalicə-profilaktika müəssisəsinə göndərildikdə.

2.8. Uşağın qrup evini müvəqqəti olaraq tərk etməsi qrup evinin direktorunun qərarı ilə rəsmiləşdirilir. Qərarda aşağıdakılar qeyd olunur:

2.8.1. uşağın soyadı, adı və yaşı;

2.8.2. şəxsin soyadı, adı, şəxsiyyət vəsiqəsinin seriyası, nömrəsi, qeydiyyat və faktiki yaşayış ünvanı;

2.8.3. uşağın qrup evini tərk etmə vaxtı;

2.8.4. əsaslandırma və səbəblər.

2.9. Uşaq qrup evini aşağıdakı hallarda daimi tərk edir:

2.9.1. qayğı başa çatdıqdan sonra valideynlərinə (digər qanuni nümayəndələrə) qaytarıldıqda;

2.9.2. övladlığa götürüldükdə;

2.9.3. 18 yaşı tamam olduqda (18 yaşınadək ümumi təhsil, peşə, orta ixtisas və ali təhsil müəssisələrinə qəbul olub həmin müəssisələrdə əyani formada təhsil alan 18 yaşına çatmış şəxslərin təhsil aldıqları müəssisələrin yataqxanalarında yerləşdirilməsi mümkün olmadığı hallarda, həmin şəxslər bu təhsilini bitirdikdə).

2.10. Uşaq qrup evini daimi tərk edərkən müddəti göstərilməklə, qrup evində olması barədə arayışla birlikdə bu Qaydaların 3.2-ci bəndində qeyd edilən sənədlərlə də təmin edilir.

3. Qrup evlərində xidmətin təşkili və uşaqların təminatı

3.1. Qrup evlərində 0-18 yaş arası uşaqlara qayğı göstərilir.

3.2. Qrup evinə qəbul edilən hər bir uşaq üçün bu Qaydaların 2.3-cü bəndində göstərilənlər də daxil olmaqla aşağıdakı məlumat və sənədlərin daxil olduğu şəxsi iş açılır:

3.2.1. doğumunun qeydiyyata alındığı yer;

3.2.2. ailə üzvlərinin sayı və tərkibi, valideyninin (valideynlərinin), qardaş və bacılarının yaşayış ünvanları, əlaqə telefonları;

3.2.3. valideynlərinin ölümündən sonra qalmış əmlakın siyahısı və bu əmlakı idarə etmək səlahiyyətinə malik şəxslər;

3.2.4. uşağın qeydiyyatda olduğu yaşayış yeri barədə sənədlər;

3.2.5. sağlamlıq tarixçəsi (peyvəndlər, keçirdiyi xəstəliklər, praktiki sağlamlıq və sağlamlıq imkanları);

3.2.6. təhsili ilə bağlı sənədlər, o cümlədən təhsil aldığı müəssisənin adı, ünvanı və telefon nömrəsi, hər 6 (altı) aydan bir uşağın təhsilə davamiyyəti haqqında yenilənmiş məlumat;

3.2.7. xüsusi təhsil nailiyyəti (fənnin növü, olimpiadanın tarixi və yeri), xüsusi idman nailiyyəti (idmanın növü, yarışmanın tarixi və yeri), üzv olduğu idman dərnəyi (dərnəyin ünvanı və uşağın üzv olduğu tarix);

3.2.8. təyin edilmiş aliment (məbləği, təyin edildiyi müddət, verilmə ardıcıllığı barədə hər 6 (altı) aydan bir yenilənmiş məlumat), təyin edilmiş ailə başçısını itirməyə görə əmək pensiyası və sosial müavinətlər (növlər üzrə ayrı-ayrılıqda), uşağın ailəsinə təyin edilmiş ünvanlı sosial yardım (məbləği və verilməsi müddəti) barədə;

3.2.9. 15 (on beş) və yuxarı yaşlı uşağın məşğulluq vəziyyəti (iş yeri, işə qəbul olunduğu və ya məşğulluq orqanında işsiz olaraq qeydiyyata alındığı tarix).

3.3. Qrup evlərində uşaqlar üçün mümkün qədər ailə mühitinə yaxın təhlükəsiz və psixoloji cəhətdən sabit, uşağın şəxsi keyfiyyətlərini, inkişafındakı xüsusiyyətləri nəzərə alan, ehtiyac və maraqlarını qarşılayan şərait yaradılır.

3.4. Uşaqların hüquqlarının bərpası məqsədilə qrup evinin təsisçisinə, tabe olduğu dövlət orqanına (qurumuna) və ya bələdiyyəyə, aidiyyəti üzrə Azərbaycan Respublikasının Daxili İşlər Nazirliyi, Azərbaycan Respublikasının Əmək və Əhalinin Sosial Müdafiəsi Nazirliyi, Azərbaycan Respublikasının Ailə, Qadın və Uşaq Problemləri üzrə Dövlət Komitəsi və aidiyyəti yerli icra hakimiyyəti orqanına maneəsiz müraciət etmək imkanı təmin edilir və həmin qurumlar tərəfindən müraciətlə əlaqədar araşdırmalar aparılır. Uşağın təhlükəsizliyini təmin etmək üçün onun hüquqlarının pozulması hallarının uçotu aparılır, onların səbəbləri təhlil olunur və gələcəkdə belə hüquqpozmaların qarşısının alınması üsullarına dair qərar qəbul edilir.

3.5. Uşaqda təhlükəsiz və əxlaq normalarına uyğun davranış bacarığı formalaşdırılır, uşaqla qrup evinin heyəti arasında qarşılıqlı etibar, inam və hörmət əsasında mühitin yaradılması təmin olunur.

3.6. Uşaqlar qrup evlərində yaşadıqları müddətdə müvafiq yaşayış sahəsi və münasib yaşayış şəraiti ilə təmin edilirlər.

3.7. Qrup evlərində xidmətlər psixoloqlar, sosial işçilər və sosial xidmətçilər tərəfindən həyata keçirilir.

3.8. Qrup evlərində hər bir uşaq üçün sosial xidmətin formasını, növünü, göstərilmə yerini və müddətini özündə əks etdirən sosial xidmətin göstərilməsinə dair fərdi plan hazırlamaqla aşağıdakı xidmətlər göstərilir:

3.8.1. uşağın səhhəti nəzərə alınmaqla, fərdi qida qəbul etmək tələbatı sosial işçi tərəfindən qiymətləndirildikdən sonra “Təhsil müəssisələrində, xəstəxanalarda və sosial sahənin digər ictimai müəssisələrində vətəndaşların qida normalarının tətbiq edilməsi haqqında” Azərbaycan Respublikası Nazirlər Kabinetinin 1994-cü il 9 mart tarixli 103 nömrəli Qərarı ilə təsdiq edilmiş 4 nömrəli əlavə - “Azərbaycan Respublikası Əmək və Əhalinin Sosial Müdafiəsi Nazirliyinin ahıllar və əlilliyi olan şəxslər üçün sosial xidmət müəssisələrində, həmçinin ağıldankəm uşaqlar üçün internat evlərində vətəndaşların qida normaları”na uyğun olaraq minimum keyfiyyət və təhlükəsizlik göstəricilərinə cavab verən qida məhsulları ilə təmin etmək; [4]

3.8.2. Azərbaycan Respublikası Nazirlər Kabinetinin 1994-cü il 17 yanvar tarixli 15 nömrəli Qərarı ilə təsdiq edilmiş “Bütün tipdən olan internat məktəblərdə, əqli və ya fiziki cəhətdən pozuntusu olan uşaqlar üçün internat məktəblərdə, uşaq evlərində, valideynlərini itirmiş və valideyn himayəsindən məhrum uşaqlar üçün internat məktəblərdə tərbiyə olunan uşaq və yeniyetmələrin geyim, ayaqqabı və yumşaq inventarlarla təmin olunması norması”na uyğun olaraq uşaqları geyim, ayaqqabı və yataq dəstləri ilə təmin etmək;

3.8.3. ilkin tibbi yardımı təşkil etmək, tibbi məsləhətlər vermək, həmçinin ehtiyacı olan uşaqların müalicə-profilaktika müəssisələrinə yerləşdirilməsini təmin etmək;

3.8.4. “Yoluxucu xəstəliklərin immunoprofilaktikası haqqında” Azərbaycan Respublikasının Qanununa uyğun olaraq, uşaqlara ərazi üzrə tibb müəssisəsi tərəfindən profilaktik peyvəndlər edilməsini təşkil etmək;

3.8.5. uşaqların təhsil hüququnu təmin etmək, onlara özünüifadə ehtiyaclarını qarşılamaq, uşaqlar üçün nəzərdə tutulmuş digər təhsil müəssisələrinə getmək imkanı yaratmaq və ev tapşırıqlarının yerinə yetirilməsində kömək göstərmək;

3.8.6. uşaqları müxtəlif peşələr və onların xüsusiyyətləri haqqında məlumatlandırmaqla, onların peşə meyillərini aşkar etmək və sadə əmək vərdişlərinə yiyələnmələrini təmin etmək;

3.8.7. uşaqların asudə vaxtlarının səmərəli və mənalı təşkili məqsədilə əyləncəli oyunlar, müsabiqələr keçirmək, yaradıcı insanlarla görüşlər təşkil etmək, onların ayda 2 dəfədən az olmayaraq ekskursiyalara, gəzintilərə, konsert və teatr tamaşalarına, muzeylərə aparılmasını, ölkənin flora və faunasının, tarixinin və mədəniyyət abidələrinin öyrənilməsini təmin etmək;

3.8.8. uşaqlar üçün bayram, istirahət, əlamətdar günlərin və tətillərin səmərəli təşkil olunmasını təmin etmək;

3.9. Qrup evlərində uşaqlar yaşlarına uyğun bədii ədəbiyyatla, dərs vəsaitləri, informasiya texnologiyaları, təhsilləri üçün zəruri olan və inkişaflarını, bacarıq və maraqlarını qarşılayan digər məktəb ləvazimatları, həmçinin oyuncaqlarla təmin olunurlar.

3.10. Qrup evlərində olan uşağa təyin olunmuş əmək pensiyası, sosial müavinət, aliment və digər sosial ödənişlər uşağın adına açılmış bank hesabına (depozitə) köçürülür. Azərbaycan Respublikasının Mülki Məcəlləsinin 30-cu maddəsinin tələblərinə uyğun olaraq, uşaq yalnız 14 yaşına çatdıqda bu bank hesabı (depozit) üzrə sərəncam verə bilər.

3.11. Uşağın formalaşmış şəxsiyyət kimi inkişaf etməsi ilə bağlı məsələlər həll edildikdə onun öz fikirlərini, münasibətini sərbəst şəkildə ifadə etməsi üçün şərait yaradılır.

3.12. Uşağın valideynləri, babaları, nənələri, qardaşları, bacıları və digər qohumları ilə ünsiyyətdə olması və onlar haqqında məlumatlar alması üçün ona müvafiq şərait yaradılır.

3.13. 14 yaşına çatmış uşaqlara şəxsi işləri ilə tanış olmaq imkanı yaradılır.

3.14. Uşaqların mümkün qədər müstəqil olması üçün qrup evlərində özünəxidmət vərdişlərinin yaradılması, əmək fəaliyyətinə və ailə həyatına hazırlanması təmin edilir.

3.15. Qrup evlərində uşaqlar tam dövlət təminatındadırlar və valideynlərini itirmiş və valideyn himayəsindən məhrum olmuş uşaqlar üçün qanunda nəzərdə tutulmuş bütün hüquq və imtiyazlardan istifadə edirlər.

4. Qrup evlərində uşaqların yaşayış şəraitinə dair tələblər

4.1. Qrup evlərində uşaqların təhlükəsizliyi, rahatlığı və ehtiyacları təmin edilməlidir.

4.2. Qrup evlərində uşaqlar sanitariya-gigiyena, yanğından mühafizə və digər tələblərə cavab verən təhlükəsiz şəraitdə yaşamalıdırlar.

4.3. Qrup evləri uşaqlar üçün müvafiq mebel və avadanlıqla təchiz edilməlidir.

4.4. Qrup evləri işıqlı, mövsümdən asılı olaraq isti və ya sərin olmalı, müvafiq ventilyasiyası, kommunal və kommunikasiya sistemi qənaətbəxş vəziyyətdə olmalıdır. Yataq otaqlarında təbii işığı və ventilyasiyanı təmin edən pəncərələr olmalıdır.

4.5. Bir qrup evində, eyni zamanda 8-12 nəfər uşaq saxlanıla bilər. Qrup evləri yalnız 18 yaşınadək əlilliyi müəyyən edilmiş şəxslər üçün yaradıldığı halda, saxlanılan uşaqların sayı 6 nəfərdən çox olmamalıdır. [5]

4.6. Qrup evlərində kanalizasiya sisteminə qoşulmuş qızlar və oğlanlar üçün ayrıca tualet, isti və soyuq su, duş və ya vanna ilə təchiz edilmiş ən azı 1 vanna otağı olmalıdır.

4.7. Müxtəlif cinsdən olan 5 yaşdan yuxarı uşaqlar ayrı-ayrı yataq otaqlarında yerləşdirilməlidirlər.

4.8. Uşağın qonaq və ya yemək otağında, yaxud digər otağa keçmək üçün içindən keçidi olan hər hansı bir otaqda yatmasına yol verilməməlidir.

4.9. İki uşağın eyni çarpayıda yatması, həmçinin 5 yaşından kiçik olan uşağın ikimərtəbəli çarpayının üst qatında yatması yolverilməzdir.

4.10. Hər bir uşaq yaxşı vəziyyətdə olan, ən azı həftədə bir dəfə və ya çirkləndikdə təmiz yataq dəsti ilə təmin edilməlidir.

4.11. 3 yaşınadək uşaqlar istisna olmaqla, uşaqların qrup evlərinin işçi heyəti ilə bir yataq otağında yatması yolverilməzdir.

4.12. Bir yataq otağında 4 uşaqdan çox uşaq yerləşdirilə bilməz.

4.13. Şəxsi gigiyena məqsədilə uşaqlar lazımi gigiyenik vasitələrlə təmin edilməlidirlər.

4.14. Qrup evlərində uşaqların təhlükəsizliyinə xələl gətirə bilən təhlükə mənbəyi olmamalı, bütövlükdə qrup evlərinin ətrafında olan həyət, zirzəmi, mansarda (girişi açıq olan), çardaq, qaraj, üstü açıq quyu (hovuz) və ya anbar ərazisi uşaqların təhlükəsizliyi baxımından yoxlanılmalıdır.

4.15. Qrup evlərində dərman preparatları, təmizlik ləvazimatları, həşəratlara qarşı vasitələr, yanacaq məhsulları, kəsici və digər təhlükəli alətlər uşaqların əli çatmayan yerlərdə və ya bağlı dolab və qutularda saxlanılmalıdır.

4.16. Qrup evlərində radiator, buxar, odun sobası, qaz və elektrik qızdırıcıları kimi istilik cihazlarından istifadə edildikdə, təhlükəsizlik qaydalarına riayət olunması təmin edilməlidir.

4.17. Qrup evlərində məişət tullantıları müvafiq örtülü qablarda saxlanılmalı, uşaqların sağlamlığı üçün təhlükə və xoşagəlməz təsir yaratmamalıdır.

4.18. Qrup evlərində tezalışan materialların istilik avadanlıqlarına yaxın yerləşdirilməsi, nasaz vəziyyətdə olan naqillərin və elektrik məişət avadanlıqlarının istifadəsi yolverilməzdir.

4.19. Qrup evlərində hər bir telefon aparatının yanında yanğından mühafizə xidmətinin və təcili tibbi yardım stansiyasının nömrələri, qəza hallarında əlaqə saxlamaq üçün məsul şəxsin, həmçinin yerləşdiyi inzibati ərazi vahidi üzrə qəyyumluq və himayə orqanının nümayəndəsinin əlaqə nömrələri olmalıdır.

4.20. Qrup evlərində uşağın nəqliyyatın hərəkətinin gur olduğu küçəyə, magistral yola, su təsərrüfatı obyektləri və ya digər təhlükəli ərazilərə getməsinin qarşısını alan hasar, yaxud maneə olmalıdır.

4.21. Qrup evlərində uşaqların təmin edildiyi oyuncaqlar texniki normativ hüquqi aktların tələblərinə uyğun olmalı, onların sağlamlığına təhlükə yaratmamalı, yaşı və inkişafı baxımından məqsədəuyğun olmalıdır.

4.22. Qrup evlərində yaşayan uşaqların adambaşına düşən sahəsi 6 kvadratmetrdən az olmamalıdır.

5. Qrup evlərində uşaqların hüquq və vəzifələri

5.1. Qrup evlərində uşaqlar aşağıdakı hüquqlara malikdirlər:

5.1.1. qrup evlərində xidmətin təşkili ilə əlaqədar öz hüquq və vəzifələri barədə məlumat almaq;

5.1.2. hüquq və təminatlarının təmin edilməsi ilə bağlı məsələlərə dair qrup evlərinin direktorlarına və digər işçilərinə müraciət etmək;

5.1.3. sanitariya-gigiyena tələblərinə cavab verən şəraitlə, zəruri mebel və avadanlıqlarla, bu Qaydaların 3.8.1-ci və 3.8.2-ci yarımbəndlərinə uyğun olaraq qida, geyim, ayaqqabı, yataq dəstləri ilə təmin olunmaq;

5.1.4. mənafelərinə zidd olduğu hallar istisna olmaqla rabitə vasitələrindən maneəsiz istifadə etmək;

5.1.5. mənafelərinə zidd olduğu hallar istisna olmaqla qrup evlərində ailə üzvləri, digər yaxın qohumları və ya qanuni nümayəndələri ilə məneəsiz görüşmək;

5.1.6. dini ayinlərin icrası üçün ayrıca yerlə təmin olunmaq;

5.1.7. şəxsi xarakterli məlumatların konfidensiallığının təmin olunmasını tələb etmək.

5.2. Qrup evlərinə qəbul edilmiş uşaqların vəzifələri aşağıdakılardır:

5.2.1. qrup evlərində daxili intizam qaydalarına riayət etmək;

5.2.2. yaşayış sahəsinin yararlı vəziyyətdə saxlanılmasını təmin etmək;

5.2.3. yanğın təhlükəsizliyi, sanitariya-gigiyena və əksepidemik rejimin norma və qaydalarına riayət etmək.

İSTİFADƏ OLUNMUŞ MƏNBƏ SƏNƏDLƏRİNİN SİYAHISI

1.       15 iyul 2022-ci il tarixli 268 nömrəli Azərbaycan Respublikası Nazirlər Kabinetinin Qərarı (“Xalq” qəzeti, 21 iyul 2022-ci il, № 151, Azərbaycan Respublikasının Qanunvericilik Toplusu, 2022-ci il, №7, maddə 819)

2.       21 sentyabr 2022-ci il tarixli 368 nömrəli Azərbaycan Respublikası Nazirlər Kabinetinin Qərarı (Azərbaycan Respublikası Nazirlər Kabinetinin rəsmi internet saytı, 23 sentyabr 2022-ci il, “Xalq” qəzeti, 27 sentyabr 2022-ci il, № 209, Azərbaycan Respublikasının Qanunvericilik Toplusu, 2022-ci il, № 9, maddə 1101)

QƏRARA EDİLMİŞ DƏYİŞİKLİK VƏ ƏLAVƏLƏRİN SİYAHISI