“Azərbaycan Respublikasının Energetika Nazirliyi ilə İndoneziya Respublikasının Energetika və Mineral Ehtiyatlar Nazirliyi arasında enerji əməkdaşlığına dair Anlaşma Memorandumu”nun təsdiq edilməsi haqqında

AZƏRBAYCAN RESPUBLİKASI PREZİDENTİNİN FƏRMANI

Azərbaycan Respublikası Konstitusiyasının 109-cu maddəsinin 17-ci bəndini rəhbər tutaraq qərara alıram:

1. 2021-ci il aprelin 30-da Bakı və Cakarta şəhərlərində imzalanmış “Azərbaycan Respublikasının Energetika Nazirliyi ilə İndoneziya Respublikasının Energetika və Mineral Ehtiyatlar Nazirliyi arasında enerji əməkdaşlığına dair Anlaşma Memorandumu” təsdiq edilsin.

2. Bu Fərmanın 1-ci hissəsində göstərilən Anlaşma Memorandumu qüvvəyə mindikdən sonra Azərbaycan Respublikasının Energetika Nazirliyi onun müddəalarının həyata keçirilməsini təmin etsin.

3. Azərbaycan Respublikasının Xarici İşlər Nazirliyi Anlaşma Memorandumunun qüvvəyə minməsi üçün zəruri olan dövlətdaxili prosedurların yerinə yetirildiyi barədə İndoneziya Respublikası Hökumətinə bildiriş göndərsin.

İlham ƏLİYEV,

Azərbaycan Respublikasının Prezidenti

Bakı şəhəri, 5 iyul 2022-ci il

                   № 1742

Azərbaycan Respublikasının Energetika Nazirliyi ilə İndoneziya Respublikasının Energetika və Mineral Ehtiyatlar Nazirliyi arasında enerji əməkdaşlığına dair

ANLAŞMA MEMORANDUMU

Bundan sonra təklikdə “Tərəf” və birlikdə isə “Tərəflər” adlandırılacaq Azərbaycan Respublikasının Energetika Nazirliyi və İndoneziya Respublikasının Energetika və Mineral Ehtiyatlar Nazirliyi,

bərabərlik və qarşılıqlı fayda prinsipi əsasında dostluq münasibətlərini daha da inkişaf etdirməyi və iki ölkə arasında əməkdaşlığı möhkəmləndirməyi arzu edərək,

hər iki ölkənin iqtisadi və sosial inkişafını artıracaq enerji əməkdaşlığına olan ehtiyacı qəbul edərək,

öz ölkələrinin qüvvədə olan müvafiq qanun və qaydalarına uyğun olaraq, öz ölkələrinin rifahı üçün enerji sahəsində mövcud potensiallarından səmərəli istifadə məqsədilə,

aşağıdakılar barədə razılığa gəldilər:

Maddə 1

Məqsədlər

Tərəflər öz milli qanunvericiliklərinə müvafiq olaraq və səlahiyyətləri çərçivəsində hökumət sektorları və dövlət mülkiyyətində olan şirkətlər arasındakı əməkdaşlıq vasitəsilə enerji sahəsində əməkdaşlığı təşviq edir və özəl sektorlar arasında əməkdaşlığı asanlaşdırırlar.

Maddə 2

Əməkdaşlıq sahələri

Tərəflər aşağıdakı sahələrdə əməkdaşlıq edirlər:

1. Hasilat (upstream) və emal (downstream) fəaliyyətləri də daxil olmaqla neft və qaz sahələrinin inkişafı proqramları;

2. Alternativ və bərpa olunan enerji mənbələri sahəsinin inkişafı; və

3. Tərəflər arasında qarşılıqlı olaraq qərarlaşdınlmış hər hansı digər əməkdaşlıq sahələri.

Maddə 3

Əməkdaşlıq formaları

Tərəflər aşağıdakılar vasitəsilə enerji sahəsində əməkdaşlığı inkişaf etdirirlər:

1. Elmi və texniki əməkdaşlıq üzrə birgə layihələrin yaradılması;

2. Eneıji sektoru ilə əlaqədar ətraf mühitin təhlükəsizliyi, qanunlar, qaydalar, siyasət və digər informasiya mübadiləsinin aparılması;

3. Birgə təlim və inkişaf proqramları;

4. Enerji investisiyası və biznes fəaliyyətlərinin təşviqi;

5. Dövlət şirkətləri və özəl şirkətlər arasında əməkdaşlığın təşviqi;

6. Birgə seminarların, konfransların, eneıji forumlarının keçirilməsi; və

7. Tərəflər arasında qarşılıqlı olaraq qərarlaşdınlmış hər hansı digər əməkdaşlıq formaları.

Maddə 4

Birgə İşçi Qrup

1. Tərəflər bu Anlaşma Memorandumu ilə bağlı müxtəlif məsələlərin müzakirəsi və həyata keçirilməsi məqsədilə Birgə İşçi Qrup təsis edə bilərlər. Birgə İşçi Qrup iş planlarının və bu Anlaşma Memorandumunun tətbiqi və qiymətləndirilməsi üçün mexanizm müəyyən edir, icra ediləcək potensial birgə layihələri müəyyənləşdirir, əməkdaşlıq proqramlarını inkişaf etdirir və bunu müvafiq Tərəflərin təsdiqi üçün təqdim edirlər.

2. Tərəflərin nümayəndələrindən ibarət Birgə İşçi Qrupun görüşü vaxtaşırı, Tərəflərin qarşılıqlı müəyyən etdiyi tarixlərdə növbə ilə Azərbaycan Respublikasında və İndoneziya Respublikasında keçirilir. Hər bir Tərəf Birgə İşçi Qrupun iclaslarında iştirakı ilə əlaqədar öz xərclərini qarşılayır.

3. Hər bir Tərəf digər Tərəfin razılığı ilə Birgə İşçi Qrupun iclasına üçüncü tərəfləri dəvət edə bilər.

Maddə 5

İcra

Tərəflər qarşılıqlı razılıq ilə əməkdaşlığın konkret sahəsini və onun əlaqədar fəaliyyətlərini müəyyən edirlər. Forma və metodlar ilə bağlı təfərrüatlar, maliyyə öhdəlikləri, eləcə də razılaşdırılmış əməkdaşlıq sahəsinin şərtləri Tərəflər arasında imzalanacaq ayrıca razılaşma ilə müəyyən edilir.

Maddə 6

Əqli mülkiyyət hüquqları

1. Bu Anlaşma Memorandumunun həyata keçirilməsi üçün bir Tərəfin təqdim etdiyi hər hansı əqli mülkiyyət həmin Tərəfin mülkiyyətində qalır.

2. Bu Anlaşma Memorandumu çərçivəsində fəaliyyətlər nəticəsində yaranmış hər hansı əqli mülkiyyət hüquqları birgə mülkiyyətdir və Tərəflər arasında imzalanmış ayrıca müqavilənin tərkib hissəsidir.

Maddə 7

Heyətin fəaliyyətlərinin məhdudlaşdırılması

Bu Anlaşma Memorandumu çərçivəsində digər Tərəfin ərazisində bir Tərəfin fəaliyyət göstərən hər hansı bir vətəndaşı digər Tərəfin siyasi müstəqilliyinə, suverenliyinə və ərazi bütövlüyünə hörmət edir və müdaxilə etmir, bu Anlaşma Memorandumunun məqsəd və məramlarına uyğun olmayan hər hansı fəaliyyətlərdən çəkinir.

Maddə 8

Fikir ayrılıqlarının həlli

Bu Anlaşma Memorandumunun təfsiri və ya tətbiqi ilə bağlı yaranan fikir ayrılığı Tərəflər arasında qarşılıqlı məsləhətləşmələr və ya danışıqlar yolu ilə dostcasına həll edilir.

Maddə 9

Məxfilik

1. Hər bir Tərəf bu Anlaşma Memorandumu çərçivəsində digər Tərəfdən birbaşa və ya dolayı yolla qəbul olunmuş sənədlərin, informasiyanın və digər məlumatların məxfiliyinə riayət edir.

2. Tərəflərin hər hansı biri bu Anlaşma Memorandumu çərçivəsindəki məxfi fəaliyyətləri və (və ya) sənədləri üçüncü tərəfə açıqlamaq niyyətindədirsə, açıqlayan Tərəf əvvəlcədən digər Tərəfdən yazılı razılıq almalıdır.

3. Bu maddənin müddəaları Tərəflərin milli qanunvericiliklərinə xələl gətirmir.

4. Bu Anlaşma Memorandumuna xitam verilməsinə baxmayaraq, bu maddənin müddəaları Tərəflər arasında qüvvədə qalmağa davam edəcəkdir.

Maddə 10

Digər beynəlxalq müqavilələr

Bu Anlaşma Memorandumunun müddəaları Tərəflərin dövlətlərinin tərəf olduğu digər beynəlxalq müqavilələrdən irəli gələn hüquq və öhdəliklərinə təsir etmir.

Maddə 11

Əlavə və dəyişikliklər

Tərəflərin qarşılıqlı razılığı ilə bu Anlaşma Memorandumuna hər hansı əlavə və dəyişikliklər edilə bilər. Belə əlavə və dəyişikliklər bu Anlaşma Memorandumunun ayrılmaz tərkib hissəsi olan ayrıca Protokollar formasında rəsmiləşdirilir və bu Anlaşma Memorandumunun 12-ci maddəsinin müddəalarına uyğun olaraq qüvvəyə minir.

Maddə 12

Qüvvəyəminmə, qüvvədəolma müddəti və ləğvedilmə

1. Bu Anlaşma Memorandumu onun qüvvəyə minməsi üçün zəruri olan müvafiq dövlətdaxili prosedurların tamamlanmasını təsdiq edən, Tərəflərin sonuncu yazılı bildirişinin diplomatik kanallar vasitəsilə alındığı tarixdə qüvvəyə minir.

2. Bu Anlaşma Memorandumu 5 (beş) il müddətinə qüvvədə qalır və Tərəflərdən biri bu Anlaşma Memorandumunu ləğv etmək niyyəti barədə ən azı 6 (altı) ay əvvəl diplomatik kanallar vasitəsilə digər Tərəfə yazılı bildiriş göndərmədiyi təqdirdə, bu Anlaşma Memorandumu növbəti 5 (beş) illik müddətlərə uzadılır.

3. Bu Anlaşma Memorandumunun ləğv edilməsi, bu Anlaşma Memorandumu çərçivəsində öhdəliyə götürülmüş davam edən hər hansı proqram və layihələrə, belə proqram və layihələr tamamlanana qədər onların etibarlılığına və davamlılığına təsir etmir.

Bunun təsdiqi olaraq, aşağıdakı şəxslər bu Anlaşma Memorandumunu imzaladılar.

Bakı şəhərində 2021-ci il 30 aprel tarixində, hər biri Azərbaycan, İndoneziya və ingilis dillərində olmaqla, iki əsl nüsxədə imzalanmışdır. Bütün mətnlər bərabər autentikdir. Bu Anlaşma Memorandumunun təfsirində hər hansı bir fikir ayrılığı yarandığı təqdirdə, ingilis dilindəki mətnə üstünlük verilir.