AZƏRBAYCAN RESPUBLİKASI MƏRKƏZİ BANKININ İDARƏ HEYƏTİNİN

QƏRARI

№ 11/2

Bakı şəhəri                                                                                              24 fevral 2023-cü il

“Rezidentlər və qeyri-rezidentlər tərəfindən xarici valyutanın Azərbaycan Respublikasına gətirilməsi və Azərbaycan Respublikasından çıxarılması Qaydaları”nın təsdiq edilməsi barədə” Azərbaycan Respublikası Mərkəzi Bankının İdarə Heyətinin 2016-cı il 03 mart tarixli 16/1 nömrəli Qərarında dəyişikliklər edilməsi barədə

“Valyuta tənzimi haqqında” Azərbaycan Respublikası Qanununun 8-ci, 9-cu və 11-ci maddələrinə və “Azərbaycan Respublikasının Mərkəzi Bankı haqqında” Azərbaycan Respublikası Qanununun 22.0.17-ci maddəsinə əsasən Azərbaycan Respublikası Mərkəzi Bankının İdarə Heyəti

QƏRARA ALIR:

1. “Rezidentlər və qeyri-rezidentlər tərəfindən xarici valyutanın Azərbaycan Respublikasına gətirilməsi və Azərbaycan Respublikasından çıxarılması Qaydaları”nın təsdiq edilməsi barədə” Azərbaycan Respublikası Mərkəzi Bankının İdarə Heyətinin 2016-cı il 03 mart tarixli 16/1 nömrəli Qərarında dəyişikliklər təsdiq edilsin (əlavə olunur).

2. Hüquq departamentinə (Rəna Məlikova) tapşırılsın ki, bu Qərarın 3 gün müddətində Azərbaycan Respublikasının Hüquqi Aktların Dövlət Reyestrinə daxil edilməsi üçün Azərbaycan Respublikasının Ədliyyə Nazirliyinə təqdim edilməsini təmin etsin.

“Rezidentlər və qeyri-rezidentlər tərəfindən xarici valyutanın Azərbaycan Respublikasına gətirilməsi və Azərbaycan Respublikasından çıxarılması Qaydaları”nın təsdiq edilməsi barədə” Azərbaycan Respublikası Mərkəzi Bankının İdarə Heyətinin 2016-cı il 03 mart tarixli 16/1 nömrəli Qərarında dəyişikliklər

“Rezidentlər və qeyri-rezidentlər tərəfindən xarici valyutanın Azərbaycan Respublikasına gətirilməsi və Azərbaycan Respublikasından çıxarılması Qaydaları”nın təsdiq edilməsi barədə” Azərbaycan Respublikası Mərkəzi Bankının İdarə Heyətinin 2016-cı il 03 mart tarixli 16/1 nömrəli Qərarında aşağıdakı dəyişikliklər edilsin:

1. adına və birinci hissəsinə “xarici valyutanın” sözlərindən sonra “və xarici valyutada qiymətli kağızların” sözləri əlavə edilsin;

2. həmin Qərarla təsdiq edilmiş “Rezidentlər və qeyri-rezidentlər tərəfindən xarici valyutanın Azərbaycan Respublikasına gətirilməsi və Azərbaycan Respublikasından çıxarılması Qaydaları” üzrə:

2.1. adına “xarici valyutanın” sözlərindən sonra “və xarici valyutada qiymətli kağızların” sözləri əlavə edilsin;

2.2. 1.2-ci bəndə “çıxarılması” sözündən sonra “, habelə xarici valyutada qiymətli kağızların Azərbaycan Respublikasına gətirilməsi və Azərbaycan Respublikasından çıxarılması” sözləri əlavə edilsin;

2.3. 1.3-cü bəndə “xarici valyuta” sözlərindən sonra “, “xarici valyutada qiymətli kağızlar” sözləri əlavə edilsin;

2.4. aşağıdakı məzmunda 1.4-cü bənd əlavə edilsin:

“1.4. Xarici valyutada olan qiymətli kağızlarla bağlı bu Qaydaların tələbləri çeklərə və digər ödəniş sənədlərinə də şamil edilir.”;

2.5. 2-ci hissənin adına “Xarici valyutanın” sözlərindən sonra “və xarici valyutada qiymətli kağızların” sözləri əlavə edilsin;

2.6. 2.1-ci bəndə “xarici valyutanı” sözlərindən sonra “və xarici valyutada qiymətli kağızları nominal məbləğindən asılı olmayaraq” sözləri əlavə edilsin;

2.7. 2.2-ci bənddə “xarici valyutanı” sözləri “nağd xarici valyutanı, habelə xarici valyutada qiymətli kağızları” sözləri ilə əvəz edilsin və həmin bənddən “nağd şəkildə” sözləri çıxarılsın;

2.8. aşağıdakı məzmunda 2.3-1-ci bənd əlavə edilsin:

“2.3-1. Rezident və qeyri-rezident fiziki və hüquqi şəxslər 10000 (on min) ABŞ dolları ekvivalenti məbləğindən artıq xarici valyutada qiymətli kağızları əvvəllər Azərbaycan Respublikasına gətirilməsini təsdiq edən gömrük sənədlərini və yazılı formada bəyannaməni gömrük orqanına təqdim etməklə Azərbaycan Respublikasından çıxara bilərlər.”.